Komuna e Mitrovicës do të investoj në transparencë, në mënyrë që qytetarët e të gjitha kategorive të jenë të informuar për punën dhe vendimet që merren në Kuvendin e Komunës dhe në strukturat tjera komunale.

Në këtë kontekst, përveç funksionimit të Zyrës për Informim, në shërbim të qytetarëve do të jetë edhe ueb-faqja komunale, e cila do freskohet vazhdimisht me informata për aktivitetet komunale, për projektet, vendimet etj.

Gjithashtu në ueb-faqen e komunës së Mitrovicës do të editohen edhe tenderët dhe konkurset e ndryshme që kanë të bëjnë më komunën, ku biznesmenë, studentë, punëtorë etj, do të mund të gjejnë të dhëna të natyrave të ndryshme që atyre ju interesojnë.

Ndër të tjera nëpërmjet kësaj faqeje të internetit, opinioni mund të informohet edhe për strukturën organizative të komunës, mandej për udhëheqësit e drejtorive, këshilltarët komunalë, komitetet e ndryshme që veprojnë në kuadër të komunës etj.

Ideja është që të forcohen sa më shumë që të jetë e mundshme shërbimet që lidhen me transparencën e punës së komunës dhe po ashtu edhe lehtësimi i qasjes në informata për të gjithë ata që janë të interesuar.

Komuna është e hapur dhe mirëpret të gjitha sugjerimet, vërejtjet, por edhe kritikat, që kanë për qëllim përmirësimin e këtyre shërbimeve që lidhen drejtpërdrejtë me aktivitetin dhe punën e komunës së Mitrovicës.